大粵港諺語註釋

大粵港諺語註釋

二零一四年三月十六日‧星期日

網上《熱血時報十六期‧2014年2月23日》流傳《神獸漫話──大粵港諺語》，頗有意思。



並附標準答案。

本人欣賞之餘，不揣冒昧，加以註釋一番。

地點：山頂。
【上山捉蟹】近義詞：緣木求魚；問和尚攞梳。解釋：難以成功。

地點：大廈。
【鬼揜眼】解釋：不知何故視而不見。揜音黯aem2，另音掩jim2。
【有錢使得鬼推磨】近義詞：財可通神。使音駛saei2。磨，麻賀切，音mo6。
【鬼拍後尾枕】解釋：自動招供；自爆內幕。
【扮鬼扮馬】近義詞：整古弄怪。解釋：偽裝。
【多隻香爐多隻鬼】解釋：有多啲路數自然多啲人搶食。
【氹鬼食豆腐】歇後語：唔會有人信。氹，他暗切，音tum3，亦作「呃鬼食豆腐」，呃音ngaek7。
【放飛機】解釋：失約。
【鬼劃符】解釋：寫字太潦草，冇人睇得明。潦，力沼切，音liu2。
【不理三七二十一】解釋：天不怕，地不怕。第二十一層地獄乃係極致，比十八層還要低，就算會被打落二十一層都不理。
【牀下底吹喇叭】解釋：低聲下氣。
【佛都有火】解釋：容忍有限度。超越佛之無限包容度。
【老貓燒鬚】解釋：有經驗者偏撞正板。貓兒（兒音衣）怕凍喜於灶頭焙火，偏偏焙火多年之老貓畀火燒鬚。
【樹大有枯枝】歇後語：族大有乞兒（兒音衣）。
【開籠雀】解釋：好唱口，口沒遮攔。
【牀下底破柴】解釋：包撞板。
【玻璃夾萬】近義詞：失匙夾萬。解釋：有得睇，冇得使。形容未有財權之富二代。
【兩頭蛇】近義詞：騎牆派。
【上邊蒸鬆糕，下邊賣涼粉。】解釋：上身着厚衫，下身着短褲或短裙。邊音便bin6。
【豬乸會上樹】解釋：形容如果男（或女）人靠得住，則豬乸都會上樹──冇可能。
【牽牛上樹】近義詞：眼眉毛長過辮。解釋：攤長工夫嚟做。
【刀仔鋸大樹】解釋：以小搏大。
【掛羊頭賣狗肉】解釋：說一套，做一套。
【賣魚佬洗身】近義詞：薑多魚少。歇後語：冇厘腥氣。腥諧音「聲」seng1。
【倒吊砂缹】近義詞：窮極無聊。解釋：冇飯開。
【煲電話粥】解釋：講電話，講極唔完，雞啄唔斷。
【冬瓜豆腐】解釋：出意外。
【十隻缹九隻蓋】近義詞：捉襟見肘。缹，俗作煲，音褒bou1；亦作罉，音撐tsang1。蓋，加再切，音goi3。

地點：城樓。
【你出葫蘆，我放飛劍】近義詞：你不仁我不義；你做初一我做十五；以牙還牙。
【城頭睇馬打交】近義詞：隔山觀虎鬥；袖手旁觀。解釋：事不關已。城，沙贏切，音seng4。
【捉到鹿唔識脫角】解釋：坐失機會。到音賭dou2。
【士急馬行田】近義詞：急者治其標。解釋：必要時犯法都要做；權宜變通。
【馬死落地行】解釋：無奈都要解決，唔通坐响度等。
【冇鞋挽屐走】解釋：走得就走。
【黑狗得食白狗當災】解釋：冤枉。

地點：水邊。
【飛象過河】解釋：不依規矩夾硬嚟。象棋中，象不得渡河。
【和尚打傘】解釋：無法無天。和尚（音賞）光頭，是以無髮，諧音「法」。開咗遮，遮住個天，故此無天。其實此詞乃北話，若果係粵語，應曰「和尚擔遮」。
【一竹篙打盡一船人】解釋：群體中只得少許壞人，餘下亦全數當作壞人。
【過橋抽板】近義詞：過河拆橋；上屋抽梯；鳥盡弓藏，兔死狗烹。解釋：利用老友渡過難關之後，不留後路與老友，話知佢死。
【牛唔飲水唔撳得牛頭低】解釋：做咗衰嘢唔好賴人。撳，加甚切，音gaem6。
【豬籠入水】財源滾滾，無孔不入。
【濕水炮仗】近義詞：虎頭蛇尾。解釋：原本可以响，結果冇聲出。
【水過鴨背】近義詞：左耳入，右耳出。解釋：冇記性，冇耳性。
【船頭尺】歇後語：度水。解釋：度，量度（音良鐸）也。此係電影《秋天的童話》之對白。
【單眼佬睇老婆】解釋：一眼見曬。形容地方淺窄。


地點：左瓦頂小屋
【菠蘿雞】解釋：廣州黃埔扶胥鎮有廟曰南海神廟，亦稱菠蘿廟，二月十三誕期擺賣黐上雞毛之泥胚，稱為菠蘿雞，俗人戲稱「一味靠黐」，譏諷人黐飲黐食也。
【畫隻耳仔上爿牆】解釋：有嘢唔該講畀爿牆聽───我唔會聽你講。
【摸門釘】解釋：無人應門。

地點：右瓦頂小屋
【老鼠拉龜】歇後語：冇地（音訂deng6）方埋手。近義詞：無法可施。
【捉黃腳雞】近義詞：仙人跳。解釋：用美人計引人入彀，詐欺錢財。
【一雞死一雞鳴】近義詞：「野火燒不盡，春風吹又生。」；「有人辭官歸故里，有人漏夜趕科場。」解釋：你唔做，有人做。
【貼錯門神】解釋：面左左。左右門神互相面對，左右換位，變成互不理啋。圖片門神倒貼，並不合理。題外話，另有「盲佬貼符」，歇後語為「倒貼」，譏諷女人畀錢男人使（音駛）。
【騎牛搵馬】解釋：是但做住份工，搵緊另外一份。
【烏龜爬門檻】歇後語：遲早跌一跤。解釋：一定失敗收科。

地點：屋前。
【狗咬狗骨】近義詞：同室操戈。解釋：自己人打自己人。
【炒魷魚】解釋：辭退。從前打工包食宿，俾人辭退自然要捲蓆走人，好似炒魷魚，熟時捲埋一舊。
【死雞撐飯蓋】解釋：死撐。不合理解釋。
【咁大隻蛤乸在街跳】近義詞：光棍佬教仔，便宜莫貪。在音才tsoi4，或轉讀為隨tsoei4。便，片然切，音pin4。
【劏白鶴】解釋：醉酒嘔吐。
【講風涼話】近義詞：幸災樂禍。解釋：搵咗着數仲要四圍唱。「話」音畫wa2。
【風吹雞蛋殼】解釋：財散人安樂。押韻句。
【雞食放光蟲】歇後語：心知肚明。近義詞：明知故問。
【食拖鞋飯】近義詞：食軟飯。解釋：遊手好閒，使女人錢（音駛餒忍淺）。
【食碗底翻碗面】近義詞：反骨，出賣。翻音反fan2。
【食死貓】解釋：受咗冤屈。
【盲佬食雲吞】解釋：肚內有數。
【籠裏雞作反】近義詞：禍起蕭牆；同室操戈。
【打蛇隨棍上】近義詞：順水推舟。解釋：乘機，趁機會。
【冇罨雞籠】解釋：自出自入。罨音掩，籠蓋也。
【大石笮死蟹】近義詞：以大欺小。笮音窄dzak8。
【混吉】解釋：得個講字。
【鬼食泥】近義詞：勉為其難。
【甩繩馬騮】近義詞：冇王（音枉）管。解釋：失控。
【賊佬試沙煲】解釋：試探。煲正寫作缹。典故請參看拙著《木人頭》一文。
【同遮唔同柄】解釋：同人唔同命。押韻句。柄，丙鏡切，音beng3。